عاغیل سیز قورد

بیری وار ایدی، بیری یوخ ایدی، تاری­دان سونرا هئچ کیم یوخ ایدی. بیر قورد واریدی بیر آز آجمیش­ ایدی. چیخیر بیز زاد تاپماغا بیر قویونا راست گلیر.

قورد دئییر: آ قویون! آجام سنی یئیه­جم!

قویون دئییر: اولسون دا... آما من یاخشی اوینایارام. دئییرسن قاباقجا سنه بیر آز اویناییم.

قورد دئییر: عئیبی یوخدور. اوینا!

قویون باشلاییر اویناماغا، یاواش-یاواش اوزاخلاشیب تو دابا قوووه­ت، بیردن قویور قاچیر. سونرا قورد گلیر بیر قوزو گؤرور.

قورد دئییر: آ قوزو! آجام سنی یئیه­جم!

قوزو دئییر: اوندا... من چوخ آریغام.  اه­تیمین دادی-دوزو اولماز! قوی گئدیم بیر آز اوتلویوم، داد-دوز تاپیم، گلیم یئ!

قورد دئییر: اولسون! گئت.

اوردان گلیر بیر گئچییه راست گلیر.

قورد دئییر: آ گئچی! آجام سنی یئیه­جم!

گئچی دئییر: من آریغام! بیر ده­ری بو سومویم. سنی دویورمارام. قوی گئدیم ایکی-اوچ ده­نه ده گئچی گتیریم هاممیمیزی بیردن یئ!

قورد دئییر: یاخشی گئت! آما تئز گل!

اوردان گلیر بیر ائششه­گه راست گلیر.

قورد دئییر: آ ائششه­ک! آجام سنی یئیه­جم!

ائششه­ک دئییر: سنین رحمت­لیک آتان منیم آتامی یئیه­نده یورغان، دؤشک اوستونده یئمیشدی. قوی گئدیم یورغان دؤشک گتیریم یات اوستونده راحت­لیک ایله منی یئ!

قورد دئییر: اولسون! گئت! آما، تئز قاییت گل!

سونرا بیر آتا راست گلیر.

قورد دئییر: آ آت! آجام، سنی یئیه­جم!

آت دئییر: اولسون دا... آما، منیم نالیمین آلتین­دا بیر بارات وار! اول اونو اوخو، سورا ایسته­سن منی یئ!

قورد آتین دالیسینا گئچیب اوزونو آتین قوزانمیش دالی قیچینا یاخین­لاش­دیراندا آت بیر ته­پیک ووروب، قوردون دیشلری سینیر توکولور و اؤزو ده بیر طه­ره­فه توللانیر. آت دا قویور قاچیر.

دیش یوخ، آج قورد، یارالی حال­دا آغلایاراق اؤز-اؤزونه بئله اوخویور:

هاردا گؤردون قویون،

یئ قالسین قورو بویون،

نئینیرسن اویون-مویون؟

هاردا گؤردون قوزو،

        یئ قالسین قورو دیزی،

                نئینرسن دادی-دوزو؟

هاردا گؤردون گئچی،

        یئ قالسین قورو قیچی،

                نئینرسن ایکی-اوچو؟

هاردا گؤردون ائششه­ک،

        یئ قالیسن قورو کؤششه­ک،

                نئینرسن دؤشک-مؤشک؟

هاردا گؤردون آت،

        یئ سونرا یانین­دا یات،

                نئینرسن بارات-مارات؟