آدامجیل قورد

دئیه­رلر بیر ایگیت کیشی­نین بیر ایگیت­جه­ده اوغلو وارایمیش. بیر گون، قیش فصلی بو اوغلان آیری بیر کنددن قاییدارکن بیر دسته قوردا راست گلیر.

قورد قیش­دا چوخ خطرلی اولار. یای­دا قارین­لاری توخ اولدوغونا گؤره آدام ایله ایش­لری اولماز. آما، قیش­دا آجلیق­دان دسته-دسته دولانیب اینسانا دا رحم ائله­مزلر.

قوردلار دالی آیاقلاری ایله قاری اوغلانین گؤز-باشینا اله­ییب سوووروب، اونو کیریخدیراندان سونرا بیر آن­دا هوجوم گتیریرلر. اوغلان­دا قاباقجادان اؤزونو حاضیرلامیش­دی و تئزدن جیلیققاسینی، چاکئتینی چیخاردیب اللـه­رینه-قوللارینا دولامیشدی. قوردلار هوجوم گتیرن زامان، اوغلان قولونو قوردلارین آغزینا وئره­رک بیر ده­یه­نک آغاج ایله اونلارین باشلارین تاپدالاییب بئشی­نی اؤلدورموشدو.

بو خبری اوغلانین آتاسی­نا وئریب دئدیلر:

- اوغلون بئش قوردو اولدوروب، آما اؤزوده یارالانیب!

آتاسی دئمیشدی:

- یوخ! منیم اوغلوم یارالانماز! یارالانسا او منیم اوغلوم اولا بیلمز.

کندلی­لر تعجب­له سوروشورلار کی:

- سنین اوغلون بئش قوردو اؤلدوروب! نه اوچون سن اونون یارالاندیغینی قبول ائده بیلمیرسن؟

اوغلانین آتاسی دئییر:

- قولاق وئرین من اونون داستانی­نی دئییم! گؤرون کی من حاقلی­یام یا یوخ!؟

 آتاسی بوجور صؤحبه­ته باشلاییر: "

جاوان چاغلاریم­دا بیزیم یئرده عجاییب بیر حادیثه اوز وئره­ردی. اؤلو اؤلن گئجه قویلانان­دان سونرا بیر حئیوان گلیب قبری قازیب اؤلونو چیخاردیب یئیه­ردی.

گونلرین بیر گونو ووردو منیم ایگیت­لیک­ده چوخ مشهور اولان داییم اؤلدو. منیم­ ده داییمین جینازه­سی چیخاردیلیب یئییلسه­ ایدی منیم اوچون چوخ باش آلچاقلیق اولا بیلردی.

اودور کی دئدیم داییمین قبری­نین یانین­دا منیم اوچون بیر چوخور قازدی­لار. گئجه سییرما قیلیج الده چوخورا گیریب گیزلندیم.

گئجه یاری­سی بیر قوردا بنزه­ر بیر حئیوانین قبره یاخین­لاشیب آیاق طه­رف­دن قبری سؤکمه­گه باشلادیغینی سئچیب، قیلیج الده اونون اوستونه یومولدوم. او حیئوان منی ساه ائتدیک­ده (سئچدیک­ده) منیم اوستومه آتیلدی و اونون ضربه­سی، منیم قورخوم قدده­ره منیم الیم­دن چیخیب بیر طرفه توللاندی. قورد ایله من توتوقلاشدیق. اؤلوم تهلوکه­سیینی قاباق­دا گؤردوک­ده وار گوجوم ایله جانیمی ساخلاماغا چالیشیردیم. ساعت­لرله بیر-بیریمیز ایله قوجاقلاشیب سوروشدوک. گاه او منی، گاه دا من اونو آلتا باسالی اولدوق. بدنیم نئچه یئردن یارالانمیش­دیر.

بو چکیشیب، سوروشمه هاوا ایشیقلاناجان داوام تاپدی. آز قالیردی کی من اونا زور گلیب باشینی یئره چیرپیب داغیدام کی بیردن قیشقیردی کی: ائوین ییخیلسین! منی اؤلدورمه! من بیر قیزام! گئجه­لر قورد دونونا گیریرم.

بئله­لیک­له، من اوندان ال چکیب، قورد دونونو چیخاردیب یاندیردیق­دان سونرا، آرواد قیشقیریب هوشدان گئتدی. هوشا گلندن سونرا من اونون­لا ائولندیم. او دئییردی کی من بیر گئجه باشی آچیق ائشیگه چیخان­دا باشیما او دونو باشیما دوشموشدو و قورد جیلدینه گیرمیشدیم. او گئجه­دن عادت ائله­میشدیم کی گئجه­لر او دونو گیرم، سحر هئچ­کس بیلمه­دن دونو چیخاردام تندیره­سرده آغاج­لارین دالی­سینا باسیب ائو ایشلرینه یئتیرم.

هه! نه باشیزی آغریدیم! بئله اولدو کی او دون یاندی و آرادان گئتدی! بو اوغلان دا او ائولنمه­نین ثمره­سی و او آروادین بالاسی­دیر. اودور کی دئییرم قورددان اولانا قورد یارا وورا بیلمز!