یکانی گور گونن ( گورگیلن)

گلین بیزیم بو اولکه یه،بوردا صفانی گورگونن

گوزل کندیم،آنایوردوم، کهریز یکانی گورگونن

دربند*سویوندان ایچگینن،کوچه لریندن گئچگینن

آرپا بوغدانی بیچگینن،سرین هاوانی گورگونن

گوی تپه دن بوغدا آشیر، قوجا ،جاوانی چالیشیر

ملتی عشقیله یاشیر، چالیشان جانی گورگونن

قالاداغی بیر افتخار، یکاناتا بیر یادگار

شکر اولونسون پروردگار، بوداغدا جانی گورگونن

کندین اول بهشت دره سی*، گونی سویی چاد دره سی*

چنلی بئلین* شور دره سی،قوری زمانی گورگونن

قیلیج بابا*،امام زادا*، کئچمیشلردن قالیب یادا

کهنه حامامی چایلیدا* عشقی،ایمانی گورگونن

جامع مسجدیندن دئیک، گول بولاغیندان* سو ایچک

شیرشیرا * یول سالیب گئدک ، بالا جنانی * گورگونن

اوغوز*،حاصارلی *، حمزه لی*،چایلی * ،یارغیب* ،قره لی*

بیرلیک یارادان ائللری، اهل یکانی گورگونن

گل تانیین جاوانلاری، فرهنگیدی انسانلاری

اورکده پاک ایمانلاری، علم نشانی گورگونن

کندیمیزین تویلاریندان، آشیقلارین سازلاریندان

بئی،گلینین خونلاریندان، گوزل میدانی گورگونن

یایلاقلاری صفالیدی، قیزگلینی حیالیدی

گوزل ائلین وفالیدی، وفالی کانی گورگونن

هله اوجادی کندیمیز، دئیله جاق فرهنگیمیز

بیزیم بوردا وطنیمیز، شیرین بیانی گورگونن

من "تیمورام" یکان ائلیم، آدی منیم شیرین دیلیم

وطن توپراقی سئوگیلیم، سئوگیلی جانی گورگونن

شاعیر: سیدتیمور جامعی

--------------------------------------------------------------------

۱- دربند: چاد دره سی. ( یکان کهریز) سویی بویرک ایله قولوق داشینی آرادان آپاریر

۲- بهشت دره سی : یئکن اولکه سی و یکان کهریزین گوزل و گورملی یئرلردن بیری دی

۳-چاد دره سی= دربند

۴-  چنللی بئل: یکان کهریزین محله لریندن بیریدی

۵- امامزاده : امازاده سلطان ارجیش

۶- قیلیج بابا : آقا میر قیلیج مقبره سی. قزیلباش قوشونوندا اولان سردارلاردان بیریدی و یکان کهریزده مقبره سی وار.

۷- اوغوزلو،حاصارلو،چایلو، حمزه لو، یارغییب و قره لی یکانکهریزین  طایفالاریندان دیلار

۸- گول بولاق : یکان کهریزده اولان قنات لاردان بیریدی

۹- شیر شیر : یکان کهریزده اولان بیر شلاله دی و سویو چوخ ایچملیدی. یاغینتیلیق چوخ اولاندا شلاله اولور.

۱۰- بالا جنان : بکیچیک بهشت،شیرشیرین گوزل منظره سینی شاعیر بیر بالاجا بهشته تشبیه ائدیب