هرکیمسه گلیب غم گونی غمخوار اولا بیلمز

هر نطفه حرام محرم اسرار اولا بیلمز

ساخلا بوسوزی، ناکسه بئل باغلما ،دوستوم

بی غیرت اولان دوستا نگهدار اولابیلمز

دوستون آز ائله،لازمه سین حجب،وفا قیل

"میلیون پشه دن لشکر جرار اولا بیلمز"

هرکیمسه کی ذاتیندا اولا -فخر، مباهات

هیهات! حذر ائت - تولکی سپهدار اولا بیلمز

انسان اودی کی ذاتی مزیندی نه جسمی

سقال ، سیبیلیله کیشی پربار اولا بیلمز

چاقال صفته باغلاما بئل سانکی بولورسن

چاقال اگر اصلان اولا، کرار اولا بیلمز

اصلان صفتیله اوتوروش، گتت گلین اولسون

هر خورماساتان "میثم تمار" اولا بیلمز

عمرون چالیش هر لحظه سی خوش خاطیره قالسین

هر لحظه کی گئتدی داها تیکرار اولا بیلمز

بیر یاخشیلیق انسانین ائده ر یادینی زنده

تاریخ بویی اخیار آدی هئچ خوار اولا بیلمز

شکر ائیله گینه " جعفری" یوخ مال-منالین

میلیارد اولا سنده ن سورا آثار اولا بیلمز

شعرونده دئنه حق سوزی قوی خلق اویانسین

                                                              عمرون قوتولار فرصت اشعار اولا بیلمز

                                                                           نعمت اله جعفریدن