آیریلیق – رامیز روشندن
یئنه بو شهرده اوز – اوزه
كلدیك،
نئیلیك ، آیرجا شهریمیز یوخ،
بلكه ده ، بیز خوشبخت اولا بیلر دیك،
بلكه ده خوشبختیك ،
خبریمیز یوخ ،
آرادان نه قدر ایل كئچیب گؤرن
تانییا بیلمدیم ، منی باغیشلا،
من ائله بیلیردیم ، سنسیز اؤلرم،
من سنسیز اؤلمدیم ، منی باغیشلا !
« اؤلمدیم » دئیرم ، نه بیلیم آخی،
یلكه ده من سنسیز اؤلموشم ائله،
قبیر سیز- كفن سیز
اؤلموشم ائله ،
بلكه ده بیز اوندا آیریلماسایدیق ،
نه من ایندیكییدیم ،
نه سن ایندیكی ،
آیریلدیق ، شئیطانی گولدوردوك اوندا
بو ایلین ،
بو آیین ،
بو گونونده كی ،
ائله بو كوچه نین بو تینین ده كی ،
منی ده ، سنی ده اؤلدوردوك اوندا ،
... ساغیمیز – سولوموز آداملا دولو ،
قول – قولا كیشیلر قادینلار كئچیر ،
اؤزوندن خبر سیز عؤمرونده مین یول ،
اؤزونو اؤلدورن آداملار كئچیر ،
كئچیر اؤز قانینا باتان آداملار ،
بیرده كی ، قان هانی ؟
قان آخی یوخدور...
هامی گوناهكاردی دونیادا ،
آمما
دونیادا هئچ كسین گوناهی یوخدو:
بیزسیز یازیلمیشدیر بو طالع ، بو باخت ،
ساپانددان آتیلان بیر جوت داشیق بیز ،
بلكه بو دونیادا اون – اون بئش ایل یوخ ،
مین ایل بوندان قاباق آیریلمیشیق بیز ،
حالال یولوموزو دیشیب ، نسه
چاشمیشیق بیر اؤزگه یولدان گئتمیشیك ،
بلكه مین ایل قاباق سهو دوشوب نسه ،
مین ایللیك بیر سهوه قوربان گئتمیشیك ،
دیشیب یئرینی بلكه قیش ، باهار ،
قاریشیب دونیانین شهری كندی ،
بلكه اؤز بطنینده اؤگئی آنالار ،
اؤگئی بالالاری گزدیریر ایندی ،
عؤمروم باشدان – باشا یالاندی ،
طا لئیم باشقایمیش دوغرودان ائله ،
او یولدان اؤتن قیز آنامدی بلكه ،
بلكه ده اوغلومدو بو اوغلان بلكه ،
بو یالان عؤمرومده گؤرن سن نه سن ؟
بلكه هئچ سئوگیلیم دئییلسن منیم ،
آنامسان ، باجیمسان ، ننمسَن ، نسن ؟
بیرجه آلله بیلیر نَییمسن منیم ،
بیزی كیم آددادار بو آیریلیقدان ،
چاتماز دادیمیزا نه یول نه كؤرپو ،
اؤلوسن ، دیریسن ، هرنه سن دایان !
دایان هئچ اولماسا الیندن اؤپوم ،
دئییرسن : « اؤلویم ، اؤلونو اؤپمه... »
الیمین ایچینده سویویور الین ،
دئییرسن : « سن آلله الیمی اؤپمه
الیمدن دئییرسن قان اییی گلیر...»
